ଭାରତ ପୁଣି ଥରେ ସ୍ପଷ୍ଟ କରିଛି ଯେ ସେ ଯୁଦ୍ଧ ଚାହୁଁ ନାହିଁ, କିନ୍ତୁ ପାକିସ୍ତାନର ଉତ୍ତେଜନାମୂଳକ ଏବଂ ଉସକାଣମୁଳକ କାର୍ଯ୍ୟକଳାପ ହେତୁ କଡ଼ା ଜବାବ ଦିଆଯାଉଛି। ବୈଦେଶିକ ସଚିବ ବିକ୍ରମ ମିସ୍ରୀ ଭାରତୀୟ ସେନାର ଦୁଇ ଯୋଦ୍ଧା ସୋଫିଆ କୁରେଶୀ ଏବଂ ବ୍ୟୋମିକା ସିଂହଙ୍କ ସହ ପୁଣି ଥରେ ପ୍ରେସକୁ ପାକିସ୍ତାନ ସହ ଚାଲିଥିବା ଲଢ଼େଇ ବିଷୟରେ ସୂଚନା ଦେଇଛନ୍ତି। ଏହି ସମୟରେ ମିସ୍ରୀ କହିଛନ୍ତି ଯେ ପାକିସ୍ତାନୀ ସେନା ପରିସ୍ଥିତିକୁ ଆହୁରି ଖରାପ କରିବା ପାଇଁ ଆକ୍ରମଣାତ୍ମକ ଉଦ୍ଦେଶ୍ୟରେ ସୀମା ଆଡ଼କୁ ସୈନିକ ପଠାଉଛି। ମିସ୍ରୀଙ୍କ ଏହି ସୂଚନା ଦୁଇ ଦେଶ ମଧ୍ୟରେ ଏବେ ସ୍ଥଳଭାଗରେ ଯୁଦ୍ଧ ଆରମ୍ଭ ହେବାର ଆଶଙ୍କା ବଢ଼ାଇ ଦେଇଛି।
ବିକ୍ରମ ମିସ୍ରୀ ପ୍ରେସ ବ୍ରିଫିଂରେ କହିଛନ୍ତି, “ମୁଁ ପୂର୍ବରୁ ଅନେକ ଥର କହିଛି ଯେ ବାରମ୍ବାର ପାକିସ୍ତାନର କାର୍ଯ୍ୟକଳାପ ହିଁ ଉତ୍ତେଜନା ବଢାଉଛି। ଏହାର ଜବାବରେ ଭାରତ ସର୍ବଦା ସଂଯମ ଏବଂ ଦାୟିତ୍ୱପୂର୍ଣ୍ଣ ଭାବେ ପ୍ରତିକ୍ରିୟା ଦେଇଛି। ପାକିସ୍ତାନୀ ସେନା ପରିସ୍ଥିତିକୁ ଆହୁରି ଖରାପ କରିବା ପାଇଁ ଆକ୍ରମଣାତ୍ମକ ଉଦ୍ଦେଶ୍ୟରେ ଫ୍ରଣ୍ଟଲାଇନକୁ ସୈନିକ ପଠାଉଛି।”
କର୍ଣ୍ଣେଲ ସୋଫିଆ କୁରେଶୀଙ୍କ ପାକିସ୍ତାନକୁ କଡ଼ା ଜବାବ
କର୍ଣ୍ଣେଲ ସୋଫିଆ କୁରେଶୀ ସ୍ପଷ୍ଟ ଭାବେ କହିଛନ୍ତି ଯେ ପାକିସ୍ତାନ ପଶ୍ଚିମ ମୋର୍ଚ୍ଚାରେ ଅନେକ ସାମରିକ ଗତିବିଧି କରିଛି। ସେ ପଞ୍ଜାବର ଏୟାରବେସକୁ ଟାର୍ଗେଟ କରିବାକୁ ମଧ୍ୟ ଚେଷ୍ଟା କରିଛି। ସେ କହିଛନ୍ତି ଯେ ପାକିସ୍ତାନ ଲମ୍ବା ଦୂରତ୍ୱର ଅସ୍ତ୍ର, ଲୋଇଟରିଂ ମ୍ୟୁନିସନ ଏବଂ ଫାଇଟର ଜେଟର ବ୍ୟବହାର କରି ଆକ୍ରମଣ କରିବାକୁ ଚେଷ୍ଟା କରିଛି, କିନ୍ତୁ ଭାରତୀୟ ବଳ ପ୍ରାୟ ସମସ୍ତ ପ୍ରୟାସକୁ ବିଫଳ କରି ଦେଇଛି। ଏହା ସହିତ ସେ କହିଛନ୍ତି, “ସବୁଠାରୁ ଗମ୍ଭୀର ଚିନ୍ତା ଏହା ଯେ ପାକିସ୍ତାନ ଲାହୋରରୁ ଉଡୁଥିବା ନାଗରିକ ବିମାନଗୁଡ଼ିକୁ ସାମରିକ ଉଦ୍ଦେଶ୍ୟ ପାଇଁ ଦୁରୁପଯୋଗ କରିଛି। ଏହା ଆନ୍ତର୍ଜାତୀୟ ନିୟମ ଏବଂ ମାନବୀୟ ମୂଲ୍ୟବୋଧର ଗମ୍ଭୀର ଉଲ୍ଲଙ୍ଘନ।”
ଏହି ସମୟରେ ପାକିସ୍ତାନୀ ସେନା ପକ୍ଷରୁ ଆଦମପୁରରେ ଭାରତର S-400 ସିଷ୍ଟମକୁ ନଷ୍ଟ କରିଥିବା ମିଛ ଦାବି ମଧ୍ୟ କରାଯାଇଛି, ଯେତେବେଳେ ସତ୍ୟ ଏହା ଯେ ଭାରତୀୟ ବାୟୁ ପ୍ରତିରକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଆକ୍ରମଣକୁ କଡ଼ା ଜବାବ ଦେଇଛି। ମେଜର ଜେନେରାଲ କୁରେଶୀ କହିଛନ୍ତି, “ଆମେ ପାକିସ୍ତାନୀ ସେନାକୁ ଭାରୀ କ୍ଷତି ପହଞ୍ଚାଇ ସାରିଛୁ, କିନ୍ତୁ ଆମେ ଏବେ ମଧ୍ୟ ଉତ୍ତେଜନା ଚାହୁଁ ନାହିଁ।”
ବ୍ୟୋମିକା ସିଂହ କ’ଣ କହିଲେ?
ଭାରତୀୟ ବାୟୁସେନାର ଉଇଙ୍ଗ କମାଣ୍ଡର ବ୍ୟୋମିକା ସିଂହ କହିଛନ୍ତି ଯେ, “ପାକିସ୍ତାନ ମୋଟ ୨୬ଟି ସ୍ଥାନରେ ଆକ୍ରମଣ କରିଛି, ଯେଉଁଥିରେ ସାମରିକ ଘାଟି ସହିତ ଆବାସିକ ଅଞ୍ଚଳକୁ ମଧ୍ୟ ଟାର୍ଗେଟ କରାଯାଇଛି। ତେବେ, ଭାରତୀୟ ସଶସ୍ତ୍ର ବଳର ତତ୍ପରତା ହେତୁ ଅଧିକାଂଶ ଆକ୍ରମଣ ବିଫଳ ହୋଇଛି ଏବଂ କ୍ଷତି ଅତ୍ୟନ୍ତ ସୀମିତ ରହିଛି।” ଏହି ଆକ୍ରମଣଗୁଡ଼ିକର ଜବାବରେ ଭାରତ ପ୍ରିସାଇଜନ ଷ୍ଟ୍ରାଇକ (ସଠିକ ଆକ୍ରମଣ) ମାଧ୍ୟମରେ ପାକିସ୍ତାନ ଭିତରେ ଥିବା ଆତଙ୍କବାଦୀ ଘାଟିଗୁଡ଼ିକୁ ଟାର୍ଗେଟ କରିଛି। ସାମରିକ ସୂତ୍ର ଅନୁଯାୟୀ, ଭାରତୀୟ ଆକ୍ରମଣ ସମୟରେ ଏହା ନିଶ୍ଚିତ କରାଯାଇଛି ଯେ କୋଲାଟେରାଲ ଡ୍ୟାମେଜ ନ୍ୟୂନତମ ହେଉ ଏବଂ ନାଗରିକମାନଙ୍କୁ କୌଣସି ପ୍ରକାର କ୍ଷତି ନ ପହଞ୍ଚେ।
ଏହା ସହିତ ସେ କହିଛନ୍ତି ଯେ ପାକିସ୍ତାନ ପକ୍ଷରୁ ଭାରତୀୟ ଏୟାରବେସକୁ ମଧ୍ୟ ଟାର୍ଗେଟ କରିବାକୁ ଚେଷ୍ଟା କରାଯାଇଥିଲା, କିନ୍ତୁ ଭାରତୀୟ ବାୟୁସେନାର ସକ୍ରିୟତା ହେତୁ କୌଣସି ଏୟାରବେସ କ୍ଷତିଗ୍ରସ୍ତ ହୋଇ ନାହିଁ। ସମସ୍ତ ଏୟାରବେସ ସମ୍ପୂର୍ଣ୍ଣ ସୁରକ୍ଷିତ ଏବଂ ପରିଚାଳନ ପାଇଁ ପ୍ରସ୍ତୁତ ଅଛି। ଏହା ସହିତ ସେ ଭାରତୀୟ ଏୟାରବେସର ସାମ୍ପ୍ରତିକ ଛବିଗୁଡ଼ିକ ମଧ୍ୟ ଦେଖାଇଛନ୍ତି, ଯାହା ପାକିସ୍ତାନର ମିଛ ଦାବିକୁ ଉଜାଗର କରିଛି।
