ଭାରତୀୟ ସେନା ଗତକାଲି ରାତିରେ ପାକିସ୍ତାନ ଏବଂ ପିଓକେ (PoK) ଅଞ୍ଚଳରେ ଥିବା ଆତଙ୍କବାଦୀ ଅଡ୍ଡାଗୁଡ଼ିକ ଉପରେ ମିସାଇଲ ବର୍ଷା କରି ସେଗୁଡ଼ିକୁ ଧୂଳିସାତ କରି ଦେଇଛି। ଯେଉଁଥିରେ ବହୁ ସଂଖ୍ୟାରେ ଆତଙ୍କବାଦୀ ନିହତ ହୋଇଛନ୍ତି। ପାକିସ୍ତାନ ଦ୍ଵାରା ସ୍ଥାପିତ ୯ଟି ଆତଙ୍କବାଦୀ ଅଡ୍ଡାକୁ ଧ୍ଵଂସ କରାଯିବା ସହିତ ପାକିସ୍ତାନର ସେୟାର ବଜାର ମଧ୍ୟ ଭୂଷୁଡ଼ି ପଡ଼ିଛି। ଅପରେସନ ସିନ୍ଦୂର ପରେ ସେୟାର ବଜାର ସକାଳେ ୬ ପ୍ରତିଶତ ହ୍ରାସ ପାଇ ଖୋଲିଥିଲା। ଯଦିଓ ପରେ କିଛି ରିକଭରି ଦେଖାଦେଇଥିଲା।
ମଙ୍ଗଳବାର ପାକିସ୍ତାନର କରାଚୀ ଷ୍ଟକ ଏକ୍ସଚେଞ୍ଜ ଇଣ୍ଡେକ୍ସ ୧୧୩,୫୬୮.୫୧ ପଏଣ୍ଟରେ ବନ୍ଦ ହୋଇଥିଲା। କିନ୍ତୁ ମଙ୍ଗଳବାର ମଧ୍ୟରାତ୍ରିରେ ଭାରତୀୟ ସେନା ପରାକ୍ରମ ଦେଖାଇଥିଲା ଏବଂ ସକାଳେ ସେୟାର ବଜାର ଖୋଲିବା ପୂର୍ବରୁ ସାରା ବିଶ୍ଵ ଏହି ଖବର ଜାଣି ସାରିଥିଲା। KSE 100 ସକାଳେ ୫.୮୩ ପ୍ରତିଶତ ହ୍ରାସ ପାଇ ୧୦୭,୦୦୭.୬୮ ପଏଣ୍ଟରେ ଖୋଲିଥିଲା। ଯଦିଓ ଖବର ଲେଖାଯିବା ସମୟ ସୁଦ୍ଧା (ସକାଳ ୧୦:୨୯ ସୁଦ୍ଧା) ଏହି ହ୍ରାସ ୨.୩୯ ପ୍ରତିଶତକୁ ହ୍ରାସ ପାଇଥିଲା।
ଭାରତୀୟ ସେୟାର ବଜାରର ପ୍ରତିକ୍ରିୟା କ’ଣ ରହିଲା?
ଭାରତୀୟ ସେୟାର ବଜାର ମଧ୍ୟ ଭାରତୀୟ ସେନାର ଏହି କାର୍ଯ୍ୟାନୁଷ୍ଠାନ ଉପରେ ପ୍ରତିକ୍ରିୟା ଦେଖାଇଥିଲା। ମୁଖ୍ୟ ବିଏସଇ ସେନସେକ୍ସ ପ୍ରାୟ ୯୦୦ ପଏଣ୍ଟ ତଳକୁ ଖୋଲିଥିଲା, କିନ୍ତୁ ଏହି ହ୍ରାସ ଅଧିକ ସମୟ ରହି ନଥିଲା। ଏହା ପରେ ତୁରନ୍ତ ବଜାର ଟ୍ରାକକୁ ଫେରିଥିଲା । ଖବର ଅପଡେଟ କରାଯିବା ସମୟ ସୁଦ୍ଧା BSE Sensex କେବଳ ୮୦,୬୩୩ ପଏଣ୍ଟରେ ଟ୍ରେଡ ହେଉଥିଲା। ଭାରତୀୟ ବଜାରର ଅନ୍ୟ ଏକ ମୁଖ୍ୟ ଇଣ୍ଡେକ୍ସ ନିଫ୍ଟି ଫିଫ୍ଟି ୨୪,୩୮୭.୭୫ ପଏଣ୍ଟରେ ଥିଲା।
ଅପରେସନ ସିନ୍ଦୂର ଉପରେ ପ୍ରେସ ବ୍ରିଫିଂରେ କ’ଣ କୁହାଗଲା?
ଅପରେସନ ସିନ୍ଦୂର ଉପରେ ବୈଦେଶିକ ସଚିବ ବିକ୍ରମ ମିଶ୍ରୀ ଏକ ପ୍ରେସ ବ୍ରିଫିଂ କରି ଜଣାଇଥିଲେ ଯେ କିପରି ଏବଂ କେଉଁ ଜିନିଷଗୁଡ଼ିକୁ ଧ୍ୟାନରେ ରଖି ପାକିସ୍ତାନରେ ଆତଙ୍କବାଦୀ ଅଡ୍ଡାଗୁଡ଼ିକ ଉପରେ ଏହି କାର୍ଯ୍ୟାନୁଷ୍ଠାନ ନିଆଗଲା। ବିକ୍ରମ ମିଶ୍ରୀ କହିଥିଲେ ଯେ ଅପରେସନ ସିନ୍ଦୂର ଆତଙ୍କବାଦର ଭିତ୍ତିଭୂମିକୁ ନଷ୍ଟ କରିବା ଏବଂ ଭାରତକୁ ପଠାଯାଉଥିବା ଆତଙ୍କବାଦୀମାନଙ୍କୁ ଅକ୍ଷମ କରିବା ପାଇଁ ଉଦ୍ଦିଷ୍ଟ। ସେ ଗୁଇନ୍ଦା ସୂଚନା ଅନୁଯାୟୀ ଜଣାଇଥିଲେ ଯେ ଭାରତ ବିରୁଦ୍ଧରେ ଆଗାମୀ ଦିନରେ ମଧ୍ୟ ଆକ୍ରମଣ ହୋଇପାରେ, କିନ୍ତୁ ସେନା ଏହାର ମୁକାବିଲା ପାଇଁ ପ୍ରସ୍ତୁତ ଅଛି।
