ରାଷ୍ଟ୍ରୀୟ ଜନତା ଦଳ (RJD)ର ବରିଷ୍ଠ ନେତା ତଥା ତିନି ଥର ବିଧାୟକ ଓ ମନ୍ତ୍ରୀ ରହିଥିବା ବୃଜବିହାରୀ ପ୍ରସାଦଙ୍କ ହତ୍ୟା ମାମଲା ୨୬ ବର୍ଷ ପରେ ପୁଣି ଥରେ ଚର୍ଚ୍ଚାରେ ଆସିଛି। ଏହା ସହିତ ପୂର୍ବତନ ବିଧାୟକ ତଥା ବାହୁବଳୀ ମୁନ୍ନା ଶୁକ୍ଳା ମଧ୍ୟ ଚର୍ଚ୍ଚାରେ ଅଛନ୍ତି। ମୁନ୍ନା ଶୁକ୍ଳା ବୃଜବିହାରୀ ପ୍ରସାଦ ହତ୍ୟାକାଣ୍ଡରେ ଜଡ଼ିତ ଥିଲେ ଏବଂ ଏହି ମାମଲାରେ ପାଟଣା ହାଇକୋର୍ଟ ଅକ୍ଟୋବର ୨୦୨୪ରେ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲା। ଯଦିଓ ହାଇକୋର୍ଟର ନିଷ୍ପତ୍ତି ବିରୁଦ୍ଧରେ ମୁନ୍ନା ଶୁକ୍ଳା ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏବେ ସୁପ୍ରିମକୋର୍ଟ ମଧ୍ୟ ହାଇକୋର୍ଟର ନିଷ୍ପତ୍ତିକୁ ବଜାୟ ରଖି ମୁନ୍ନା ଶୁକ୍ଳାଙ୍କୁ ୧୫ ଦିନ ମଧ୍ୟରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଛନ୍ତି।
ବୃଜବିହାରୀ ପ୍ରସାଦ ଏବଂ ମୁନ୍ନା ଶୁକ୍ଳା କୌଣସି ସାଧାରଣ ନାମ ନୁହନ୍ତି। ବିହାରରେ ରାଜନୀତିର ଅପରାଧୀକରଣ କିମ୍ବା ବିହାରରେ ଅପରାଧର ରାଜନୀତିକରଣରେ ଏହି ଦୁଇ ବ୍ୟକ୍ତିଙ୍କର ବହୁତ ବଡ଼ ଯୋଗଦାନ ରହିଛି। ଏହାହିଁ କାରଣ ଯେ ବିହାରରେ ତତ୍କାଳୀନ ମୁଖ୍ୟମନ୍ତ୍ରୀ ରାବଡ଼ୀ ଦେବୀଙ୍କ ଅତ୍ୟନ୍ତ ନିକଟତର ମନ୍ତ୍ରୀ ବୃଜବିହାରୀଙ୍କୁ ୧୯୯୮ ମସିହାରେ ପାଟଣାର ଇନ୍ଦିରା ଗାନ୍ଧୀ ଆୟୁର୍ବିଜ୍ଞାନ ସଂସ୍ଥାନରେ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାକୁ ଉତ୍ତରପ୍ରଦେଶର ‘ଡନ୍’ ଶ୍ରୀପ୍ରକାଶ ଶୁକ୍ଳା ତାଙ୍କ ସାଙ୍ଗମାନଙ୍କ ସହ ମିଶି କଡ଼ା ସୁରକ୍ଷା ବ୍ୟବସ୍ଥା ସତ୍ତ୍ୱେ ଘଟାଇଥିଲେ। ଏହି ଘଟଣାକୁ ଭଲ ଭାବେ ବୁଝିବା ପାଇଁ ଆସନ୍ତୁ, ଆରମ୍ଭରୁ ଆରମ୍ଭ କରିବା ।
ରମା ପ୍ରସାଦ ଛୋଟନ ଶୁକ୍ଳାଙ୍କୁ ରାଖୀ ବାନ୍ଧୁଥିଲେ
୧୯୭୦ ଦଶକରୁ ଆରମ୍ଭ ହୁଏ ଅପରାଧର କାହାଣୀ । ସେହି ସମୟରେ ବୈଶାଳୀରୁ ପାଟଣା ପର୍ଯ୍ୟନ୍ତ ଲାଲଗଞ୍ଜରୁ ବାହୁବଳୀ ଛୋଟନ ଶୁକ୍ଳାଙ୍କର ଆଧିପତ୍ୟ ଥିଲା। ସେହି ସମୟରେ ବିହାରରେ ଜାତିଗତ ସଂଘର୍ଷ ଚରମ ସୀମାରେ ଥିଲା। ଛୋଟନ ଶୁକ୍ଳା ଅଞ୍ଚଳର ଦବଙ୍ଗମାନଙ୍କୁ ନିୟନ୍ତ୍ରଣ କରିବା ପାଇଁ ମୋତିହାରୀର ଆରଜେଡି ନେତା ବୃଜବିହାରୀ ପ୍ରସାଦଙ୍କ ସହ ଯୋଗାଯୋଗ କରିଥିଲେ। କୁହାଯାଏ ଯେ ଉଭୟଙ୍କ ମଧ୍ୟରେ ଏପରି ବନ୍ଧୁତା ହୋଇଥିଲା ଯେ ଦୁହେଁ ଗୋଟିଏ ଥାଳିରେ ଖାଉଥିଲେ। ଏପରିକି ବୃଜବିହାରୀଙ୍କ ପତ୍ନୀ ରମା ପ୍ରସାଦ ଛୋଟନଙ୍କୁ ରାଖୀ ବାନ୍ଧୁଥିଲେ। ଏହା ଯୋଗୁଁ କିଛି ଦିନ ମଧ୍ୟରେ ବିହାରର ରାଜନୀତିରୁ ଆରମ୍ଭ କରି ଅପରାଧ ପର୍ଯ୍ୟନ୍ତ ଛୋଟନ ଶୁକ୍ଳାଙ୍କର ବଡ଼ ନାମ ହୋଇଥିଲା। ଏପରି ପରିସ୍ଥିତିରେ ଛୋଟନ ଧୀରେ ଧୀରେ ବୃଜବିହାରୀଙ୍କ ଛତ୍ରଛାୟାରୁ ବାହାରକୁ ଆସିବାକୁ ଆରମ୍ଭ କରିଥିଲେ।
ଶ୍ରୀପ୍ରକାଶ ଶୁକ୍ଳାଙ୍କ ଦ୍ୱାରା ବୃଜବିହାରୀଙ୍କ ହତ୍ୟା
ଛୋଟନ ଏବେ ରାଜନୀତିରେ ନିଜର କ୍ୟାରିୟର ଖୋଜୁଥିଲେ। ଏହା ଯୋଗୁଁ ବୃଜବିହାରୀ ପ୍ରସାଦଙ୍କ ସହ ତାଙ୍କର ସଂଘର୍ଷ ଆରମ୍ଭ ହୋଇଥିଲା। କୁହାଯାଏ ଯେ ଏହି ସଂଘର୍ଷ କାରଣରୁ ବୃଜବିହାରୀ ୧୯୯୪ରେ ଛୋଟନ ଶୁକ୍ଳାଙ୍କ ହତ୍ୟା କରାଇଥିଲେ । ଏହା ପରେ ଛୋଟନଙ୍କ ଗ୍ୟାଙ୍ଗର ନେତୃତ୍ୱ ନେଇଥିଲେ ତାଙ୍କ ଭାଇ ଭୁଟକୁନ । କିନ୍ତୁ ପରବର୍ତୀ ବର୍ଷ ଅର୍ଥାତ୍ ୧୯୯୫ରେ ତାଙ୍କୁ ମଧ୍ୟ ହତ୍ୟା କରାଯାଇଥିଲା। ଭୁଟକୁନଙ୍କୁ ତାଙ୍କ ନିଜ ସୁରକ୍ଷା ଗାର୍ଡ ଗୁଳି କରି ମାରିଥିଲେ। ଶେଷରେ ସବୁଠାରୁ ଛୋଟ ଭାଇ ମୁନ୍ନା ଶୁକ୍ଳା ପଇତା ହାତରେ ଧରି ବୃଜବିହାରୀଙ୍କ ସର୍ବନାଶର ଶପଥ ନେଇ ଅପରାଧମୁଖୀ ରାଜନୀତିରେ ପ୍ରବେଶ କରିଥିଲେ। ଯେହେତୁ ଏତେ ସମୟ ମଧ୍ୟରେ ବୃଜବିହାରୀ ନିଜର ଶକ୍ତି ବେଶ୍ ବୃଦ୍ଧି କରିସାରିଥିଲେ, ତେଣୁ ମୁନ୍ନା ଶୁକ୍ଳା ପାଇଁ ତାଙ୍କ ପାଖକୁ ପହଞ୍ଚିବା ସହଜ ନଥିଲା। ଏପରି ପରିସ୍ଥିତିରେ ମୁନ୍ନା ଶୁକ୍ଳା ଶ୍ରୀପ୍ରକାଶ ଶୁକ୍ଳାଙ୍କ ସହ ହାତ ମିଳାଇଥିଲେ ଏବଂ ୧୯୯୮ ମସିହାରେ ବୃଜବିହାରୀ ପ୍ରସାଦଙ୍କୁ ଦିବାଲୋକରେ ହତ୍ୟା କରାଯାଇଥିଲା।
ମୁଖ୍ୟମନ୍ତ୍ରୀ ନିବାସ ପର୍ଯ୍ୟନ୍ତଆତଙ୍କ
ଏହି ଘଟଣାର ଆତଙ୍କ ସମଗ୍ର ବିହାରରେ ଦେଖାଯାଇଥିଲା। ପରିସ୍ଥିତି ଏପରି ଥିଲା ଯେ ହତ୍ୟାର ଖବର ଶୁଣି ମୁଖ୍ୟମନ୍ତ୍ରୀ ରାବଡ଼ୀ ଦେବୀ ଏବଂ ପୂର୍ବତନ ମୁଖ୍ୟମନ୍ତ୍ରୀ ଲାଲୁ ୟାଦବ ନିଜ ଚାରିପାଖରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଥିଲେ। ଏହା ସହ, ବୃଜବିହାରୀ ପ୍ରସାଦଙ୍କ ପରିବାର ସବୁକିଛି ଜାଣି ମଧ୍ୟ ପୁଲିସରେ ଏଫଆଇଆର ଦାୟର କରିନଥିଲେ। ଏହି ଘଟଣାରେ ଶ୍ରୀପ୍ରକାଶ ଶୁକ୍ଳା ଓ ମୁନ୍ନା ଶୁକ୍ଳାଙ୍କ ସହ ରାଜନ ତିୱାରୀ ଏବଂ ସୂରଜଭାନଙ୍କ ନାମ ମଧ୍ୟ ସାମନାକୁ ଆସିଥିଲା। ୧୯୯୮ରେ ଶ୍ରୀପ୍ରକାଶ ପୁଲିସ ଏନକାଉଣ୍ଟରରେ ମୃତ୍ୟୁବରଣ କରିଥିଲେ। ଅନ୍ୟପକ୍ଷରେ, ୨୦୦୯ରେ ପାଟଣାର ଅଦାଲତ ଅବଶିଷ୍ଟ ଅଭିଯୁକ୍ତମାନଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲା। ମୁନ୍ନା ଶୁକ୍ଳାଙ୍କ ନାମ ୧୯୯୪ରେ ହୋଇଥିବା ଡିଏମ ଜି. କୃଷ୍ଣୈୟାଙ୍କ ହତ୍ୟା ମାମଲାରେ ମଧ୍ୟ ଆସିଥିଲା। ଯଦିଓ ଏହି ମାମଲାରେ ପ୍ରମାଣର ଅଭାବରୁ ମୁନ୍ନା ଶୁକ୍ଳା ନିର୍ଦ୍ଦୋଷ ସାବ୍ୟସ୍ତ ହୋଇଥିଲେ, କିନ୍ତୁ ବାହୁବଳୀ ବିଧାୟକ ଆନନ୍ଦ ମୋହନଙ୍କୁ ଦଣ୍ଡ ମିଳିଥିଲା। ସେ ନିକଟରେ ଜେଲରୁ ସଜା କାଟି ବାହାରକୁ ଆସିଛନ୍ତି।
ଏବେ ଆରଜେଡିରେ ଅଛନ୍ତି ମୁନ୍ନା ଶୁକ୍ଳା
ମୁନ୍ନା ଶୁକ୍ଳାଙ୍କ ରାଜନୀତି ଆରଜେଡିର ଜାତିବାଦୀ ରାଜନୀତି ବିରୁଦ୍ଧରେ ଆରମ୍ଭ ହୋଇଥିଲା। ପ୍ରାୟ ଚାରି ଦଶନ୍ଧି ପର୍ଯ୍ୟନ୍ତ ସେ ଆରଜେଡିର ନିଶାନାରେ ରହିଥିଲେ। ରାଜନୀତିରେ କେତେବେଳେ ବନ୍ଧୁ ଶତ୍ରୁ ହୋଇଯାଏ ଏବଂ କେତେବେଳେ ଶତ୍ରୁତା ବନ୍ଧୁତାରେ ବଦଳିଯାଏ, ତାହା କହିହେବ ନାହିଁ। ଗତ କିଛି ଦିନ ହେବ ମୁନ୍ନା ଶୁକ୍ଳା ଆରଜେଡି ସହ ନିକଟତା ବଢ଼ାଉଥିବା ଦେଖାଯାଉଛନ୍ତି। ଗତ ବିଧାନସଭା ନିର୍ବାଚନରେ ମୁନ୍ନା ଶୁକ୍ଳାଙ୍କ ପତ୍ନୀ ଆରଜେଡିର ଟିକେଟରେ ବୈଶାଳୀରୁ ନିର୍ବାଚନ ଲଢ଼ିଥିଲେ, କିନ୍ତୁ ହାରି ଯାଇଥିଲେ। ଏବେ ସେ ପୁଣି ଥରେ ଆରଜେଡି ଟିକେଟରେ ନିର୍ବାଚନ ଲଢ଼ିବାକୁ ପ୍ରସ୍ତୁତି କରୁଛନ୍ତି। ଏହା ମନେ କରାଯାଉଛି ଯେ ସୁପ୍ରିମକୋର୍ଟର ନିଷ୍ପତ୍ତି ପରେ ମୁନ୍ନା ଶୁକ୍ଳା ଜେଲ ଯାଇପାରନ୍ତି, କିନ୍ତୁ ତାଙ୍କ ରାଜନୀତି ଜାରି ରହିବ।
