ହରିଆନା ହିସାରର ନ୍ୟୁ ଅଗ୍ରସେନ କଲୋନୀର ୩୩ ବର୍ଷୀୟ ୟୁଟ୍ୟୁବର ଜ୍ୟୋତି ମଲହୋତ୍ରାଙ୍କୁ ପାକିସ୍ତାନ ପାଇଁ ଗୁଇନ୍ଦାଗିରି ଅଭିଯୋଗରେ ଗିରଫ କରାଯାଇଛି। ଏକ ସାଧାରଣ ପରିବାରରୁ ଆସିଥିବା ଜ୍ୟୋତିଙ୍କର ଆଡ଼ମ୍ବରପୂର୍ଣ୍ଣ ଜୀବନଯାପନ କରିବାର ଇଚ୍ଛା ତାଙ୍କୁ କଥିତ ରୂପେ ଦେଶ ବିରୋଧୀ କାର୍ଯ୍ୟକଳାପ ଆଡ଼କୁ ଠେଲି ଦେଇଥିଲା। ଜ୍ୟୋତି ତାଙ୍କ ପିତା ହରିଶ ମଲହୋତ୍ରାଙ୍କ ସହ ୫୮ ଗଜର ଏକ ଘରେ ରହୁଛନ୍ତି। ତାଙ୍କ ପିତା ପେଶାରେ ଜଣେ ବଢ଼େଇ ଏବଂ ମାଆଙ୍କ ସହ ତାଙ୍କର ବିବାହ ବିଚ୍ଛେଦ ହୋଇଛି। ଜ୍ୟୋତି ତାଙ୍କର ଏକମାତ୍ର ସନ୍ତାନ। ସୋସିଆଲ ମିଡିଆରେ ସେ ବଡ଼ ଗାଡ଼ି, ଆଡ଼ମ୍ବରପୂର୍ଣ୍ଣ ସ୍ଥାନ ଓ ବିଦେଶ ଯାତ୍ରାରେ ନଜର ଆସୁଥିଲେ ହେଁ, ତାଙ୍କ ପାରିବାରିକ ଅବସ୍ଥା ଅତ୍ୟନ୍ତ ସାଧାରଣ।
ଦ୍ୱାଦଶ ପରେ ଚାକିରି
ଜ୍ୟୋତି ଦ୍ୱାଦଶ ପରେ କାମ କରିବା ଆରମ୍ଭ କରିଥିଲେ। ସର୍ବପ୍ରଥମେ ସେ ଏକ କୋଚିଂ ସେଣ୍ଟରରେ ରିସେପ୍ସନିଷ୍ଟ ଭାବେ କାମ କରିଥିଲେ। ପରେ ଏକ ବେସରକାରୀ ବିଦ୍ୟାଳୟରେ ପଢ଼ାଇଥିଲେ ଏବଂ ତା’ପରେ ହିସାରର ଏକ ବେସରକାରୀ ଅଫିସରେ ରିସେପ୍ସନିଷ୍ଟ ଭାବେ କାର୍ଯ୍ୟ କରିଥିଲେ। ତାଙ୍କ ଜୀବନରେ କରୋନା କାଳ ବଡ଼ ପରିବର୍ତ୍ତନ ଆସିଥିଲା, ସେହି ସମୟରେ ସେ ଦିଲ୍ଲୀର ଚାକିରି ଛାଡ଼ି ହିସାର ଫେରିଥିଲେ। ଏହି ସମୟରୁ ସେ ସୋସିଆଲ ମିଡିଆରେ ଟ୍ରାଭେଲ ଭିଡିଓ ତିଆରି ଆରମ୍ଭ କରିଥିଲେ। ଧୀରେ ଧୀରେ ତାଙ୍କୁ ୟୁଟ୍ୟୁବ ଓ ଇନଷ୍ଟାଗ୍ରାମରୁ ରୋଜଗାର ହେବାକୁ ଲାଗିଲା।
ପାକିସ୍ତାନ ସହ ଜଡ଼ିତ ବିବାଦ
ଜ୍ୟୋତି ‘ଟ୍ରାଭେଲ ଉଇଥ ଜୋ’ ନାମକ ଏକ ୟୁଟ୍ୟୁବ ଚ୍ୟାନେଲ ଆରମ୍ଭ କରିଥିଲେ, ଯେଉଁଠି ସେ ଦେଶ-ବିଦେଶ ଯାତ୍ରା ସମ୍ବନ୍ଧୀୟ ଅନୁଭବ ସେୟାର କରୁଥିଲେ। ତାଙ୍କର ୟୁଟ୍ୟୁବରେ ୩.୭୭ ଲକ୍ଷ ଏବଂ ଇନଷ୍ଟାଗ୍ରାମରେ ୧.୩୮ ଲକ୍ଷ ଫଲୋଅର୍ସ ଅଛନ୍ତି। ତାଙ୍କ ଚ୍ୟାନେଲରେ ପାକିସ୍ତାନର ସକାରାତ୍ମକ ଚିତ୍ର ଦେଖାଉଥିବା ଭିଡିଓ ମଧ୍ୟ ଅପଲୋଡ କରାଯାଇଛି। ସୂତ୍ର ଅନୁଯାୟୀ, ଜ୍ୟୋତିଙ୍କର ଦିଲ୍ଲୀସ୍ଥିତ ପାକିସ୍ତାନ ଉଚ୍ଚାୟୋଗର ଅଧିକାରୀ ଏହସାନ-ଉର-ରହିମ ଉର୍ଫ ଦାନିଶଙ୍କ ସହ ସାକ୍ଷାତ ହୋଇଥିଲା। ଏହା ପରେ ସେ ଗୁଇନ୍ଦା ନେଟୱାର୍କରେ ଫସି ପଡ଼ିଥିଲେ।
ଦୁଇଥର ପାକିସ୍ତାନ ଯାତ୍ରା
ଜ୍ୟୋତି ଏପର୍ଯ୍ୟନ୍ତ ଦୁଇଥର ପାକିସ୍ତାନ ଯାତ୍ରା କରିଛନ୍ତି। ଗୋଟିଏ ଥର ଏକାକୀ ଏବଂ ଅନ୍ୟ ଥରେ ଶିଖ ଜତ୍ଥା ସହ କରତାରପୁର ସାହିବ ଦର୍ଶନ ପାଇଁ ଯାଇଥିଲେ। ଏହା ବ୍ୟତୀତ ସେ ଦୁବାଇ, ଥାଇଲ୍ୟାଣ୍ଡ, ଇଣ୍ଡୋନେସିଆ, ନେପାଳ, ଭୂଟାନ, ଚୀନ ଏବଂ ବାଂଲାଦେଶ ଯାତ୍ରା ମଧ୍ୟ କରିଛନ୍ତି। ହିସାର ପୁଲିସ ଜ୍ୟୋତି ବ୍ୟତୀତ ତାଙ୍କର ଅନ୍ୟ ପାଞ୍ଚ ସାଙ୍ଗକୁ ମଧ୍ୟ ଗିରଫ କରିଛି। କୁହାଯାଉଛି ଯେ ଏମାନେ ସମସ୍ତେ ପାକିସ୍ତାନ ପାଇଁ ସମ୍ବେଦନଶୀଳ ସୂଚନା ପଠାଉଥିବାର ଅଭିଯୋଗ ରହିଛି।
ପିତା ଝିଅକୁ କହିଲେ ନିର୍ଦ୍ଦୋଷ
ଆଇବିର ଇନପୁଟ ଅନୁଯାୟୀ, ଜ୍ୟୋତି ତାଙ୍କ ସୋସିଆଲ ମିଡିଆ ଚ୍ୟାନେଲ ମାଧ୍ୟମରେ କଶ୍ମୀର, ପାକିସ୍ତାନ ଏବଂ ଭାରତ-ପାକିସ୍ତାନ କ୍ରିକେଟ ମ୍ୟାଚ ସମ୍ବନ୍ଧୀୟ ଭିଡିଓ ତିଆରି କରିଛନ୍ତି, ଯେଉଁଥିରେ ସୁରକ୍ଷା ସହ ଜଡ଼ିତ ସମ୍ବେଦନଶୀଳ ତଥ୍ୟ ମଧ୍ୟ ଫିଲ୍ମ କରାଯାଇଛି। ଜ୍ୟୋତିଙ୍କ ପିତା ହରିଶ ମଲହୋତ୍ରା କହିଛନ୍ତି ଯେ, “ମୋ ଝିଅ ପାକିସ୍ତାନ ନିଶ୍ଚିତ ଭାବେ ଯାଇଥିଲା, କିନ୍ତୁ ସେ କୌଣସି ଭୁଲ କାମ କରି ନାହିଁ। ତାକୁ ଜାଣିଶୁଣି ଫସାଯାଉଛି।” ସେ କହିଛନ୍ତି ଯେ ତାଙ୍କୁ ୟୁଟ୍ୟୁବରୁ ହେଉଥିବା ରୋଜଗାର ବିଷୟରେ କୌଣସି ସୂଚନା ନାହିଁ ଏବଂ ସେ ଝିଅର ରୋଜଗାରରେ କେବେ ହସ୍ତକ୍ଷେପ କରି ନାହାନ୍ତି।
