ପ୍ରତିଦିନ ୨୧ଟି ମିଛ କହୁଥିବା ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ-ପାକିସ୍ତାନ ଯୁଦ୍ଧବିରତି ଉପରେ ଗୋଟିଏ ପରେ ଗୋଟିଏ ଦାବି କରିଚାଲିଛନ୍ତି। ଏପରି କି ସେ କହିଛନ୍ତି ଯେ ପାକିସ୍ତାନ ପରମାଣୁ ଆକ୍ରମଣ କରିବାକୁ ଯାଉଥିଲା, ମୁଁ ଭାରତକୁ ଜଣାଇଲି ଏବଂ ତା’ପରେ ସେମାନେ ଯୁଦ୍ଧବିରତି କଲେ। ପରେ ସେ କହିଲେ, ଆମେ ଭାରତ ଓ ପାକିସ୍ତାନକୁ କହିଥିଲୁ ଯେ ଯଦି ଯୁଦ୍ଧ ବନ୍ଦ ନୁହେଁ, ତେବେ ଆମେ ବାଣିଜ୍ୟ କରିବୁ ନାହିଁ। ପୁଣି କହିଲେ, କାଶ୍ମୀର ଉପରେ ଭାରତ ଓ ପାକିସ୍ତାନ ମଧ୍ୟରେ ବିବାଦରେ ଆମେ ମଧ୍ୟସ୍ଥତା କରିବାକୁ ପ୍ରସ୍ତୁତ ଅଛୁ। ଭାରତ ଟ୍ରମ୍ପଙ୍କର ଏହି ସମସ୍ତ ଦାବିକୁ ମିଛ ବୋଲି କହି ଖାରଜ କରିଦେଇଛି। ବୈଦେଶିକ ମନ୍ତ୍ରଣାଳୟ କହିଛି, ଆମେରିକୀୟ ନେତାମାନଙ୍କ ସହ କାଶ୍ମୀର କିମ୍ବା ବାଣିଜ୍ୟ ବିଷୟରେ କୌଣସି ଆଲୋଚନା ହୋଇନାହିଁ। ଭାରତ ପରମାଣୁ ବ୍ଲାକମେଲିଂ ସହିବ ନାହିଁ।
ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, ଯେତେବେଳେ ଆମେ ବିଶ୍ୱର ଅନ୍ୟ ଦେଶମାନଙ୍କ ସହ ଆଲୋଚନା କରୁଥିଲୁ, ତେବେ ଭାରତର ବାର୍ତ୍ତା ସମ୍ପୂର୍ଣ୍ଣ ସ୍ପଷ୍ଟ ଥିଲା। ଆମେ ସାର୍ବଜନୀନ ଭାବେ ଯାହା କହୁଥିଲୁ, ସେହି କଥା ହିଁ ବିଶ୍ୱର ଯେକୌଣସି ନେତାଙ୍କ ସହ ବ୍ୟକ୍ତିଗତ ଆଲୋଚନାରେ ମଧ୍ୟ କୁହାଯାଇଥିଲା। ଆମେ ସ୍ପଷ୍ଟ କହିଥିଲୁ ଯେ ଯଦି ପାକିସ୍ତାନୀ ସେନା ଗୁଳିଚାଳନା କରେ, ତେବେ ଭାରତୀୟ ସେନା ମଧ୍ୟ ଜବାବୀ ଗୁଳିଚାଳନା କରିବ। ଯଦି ପାକିସ୍ତାନ ଯୁଦ୍ଧ ବନ୍ଦ କରେ, ତେବେ ଭାରତ ମଧ୍ୟ ବନ୍ଦ କରିବ। ଏହି ବାର୍ତ୍ତା ଅପରେସନ ସିନ୍ଦୁର ଆରମ୍ଭ ସମୟରେ ପାକିସ୍ତାନକୁ ଦିଆଯାଇଥିଲା, ଯାହାକୁ ସେତେବେଳେ ପାକିସ୍ତାନ ଗୁରୁତ୍ୱ ଦେଇନଥିଲା। ସ୍ୱାଭାବିକ ଭାବେ ଅନେକ ବିଦେଶୀ ନେତା ଏହି କଥା ଶୁଣିଥିବେ ଏବଂ ସେମାନେ ନିଜର ପାକିସ୍ତାନୀ ସହଯୋଗୀମାନଙ୍କୁ ଏହା ବିଷୟରେ ଜଣାଇଥିବେ।
କାଶ୍ମୀର ଉପରେ ତୃତୀୟ ଦେଶର ହସ୍ତକ୍ଷେପ ଗ୍ରହଣୀୟ ନୁହେ
ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି, କାଶ୍ମୀର ପ୍ରସଙ୍ଗରେ ଆମର ଦୀର୍ଘ ସମୟରୁ ଏକ ନୀତି ରହିଛି ଯେ ଭାରତୀୟ କେନ୍ଦ୍ରଶାସିତ ପ୍ରଦେଶ ଜମ୍ମୁ ଓ କାଶ୍ମୀର ସମ୍ବନ୍ଧୀୟ ଯେକୌଣସି ମୁଦ୍ଦାକୁ ଭାରତ ଓ ପାକିସ୍ତାନ ମିଳିତ ଭାବେ ସମାଧାନ କରିବ। ଆମେ ଏହି ନୀତି ବଦଳାଇ ନାହୁଁ। କୌଣସି ତୃତୀୟ ଦେଶର ହସ୍ତକ୍ଷେପ ଏଥିରେ ଆଦୌ ଗ୍ରହଣୀୟ ନୁହେ। ବର୍ତ୍ତମାନ ଯଦି ଆଲୋଚନା ହେବ, ତେବେ କେବଳ ପିଓକେ (ପାକିସ୍ତାନ ଅଧିକୃତ କାଶ୍ମୀର) ଉପରେ ହେବ, ଯାହା ପାକିସ୍ତାନର ଅଧୀନରେ ଅଛି। ଏହା ହିଁ ଏକମାତ୍ର ବିବାଦୀୟ ମୁଦ୍ଦା ବାକି ରହିଛି। ପାକିସ୍ତାନକୁ ପିଓକେ ଖାଲି କରିବାକୁ ହେବ।
ଟ୍ରମ୍ପ ଓ ବାଣିଜ୍ୟ ଉପରେ
ଟ୍ରମ୍ପ ଦାବି କରିଥିଲେ ଯେ ଆମେ ଦ୍ୱିପାକ୍ଷିକ ବାଣିଜ୍ୟ କଥା କହି ଭାରତ-ପାକିସ୍ତାନ ମଧ୍ୟରେ ଯୁଦ୍ଧବିରତି କରାଇଥିଲୁ, କିନ୍ତୁ ବୈଦେଶିକ ମନ୍ତ୍ରଣାଳୟ ତାଙ୍କ ଦାବିକୁ ଖାରଜ କରିଦେଇଛି। ରଣଧୀର ଜୟସୱାଲ କହିଛନ୍ତି, ୦୭ ମେ’ରୁ ଅପରେସନ ସିନ୍ଦୁର ଆରମ୍ଭ ହେବା ଠାରୁ ୧୦ ମେ’ରେ ଗୁଳିଚାଳନା ଓ ସୈନ୍ୟ କାର୍ଯ୍ୟାନୁଷ୍ଠାନ ବନ୍ଦ କରିବା ଉପରେ ସହମତି ହେବା ପର୍ଯ୍ୟନ୍ତ, ଭାରତୀୟ ଓ ଆମେରିକୀୟ ନେତାମାନଙ୍କ ମଧ୍ୟରେ କେବଳ ସୈନ୍ୟ କାର୍ଯ୍ୟାନୁଷ୍ଠାନ ବିଷୟରେ ହିଁ ଆଲୋଚନା ହୋଇଥିଲା। କୌଣସି ଆଲୋଚନାରେ ବାଣିଜ୍ୟ ପ୍ରସଙ୍ଗ ଉଠି ନଥିଲା।
ପରମାଣୁ ଯୁଦ୍ଧ ଅଟକଳ ଉପରେ
ବୈଦେଶିକ ମନ୍ତ୍ରଣାଳୟ କହିଛି, ଭାରତର ସୈନ୍ୟ କାର୍ଯ୍ୟାନୁଷ୍ଠାନ ପାରମ୍ପରିକ ଥିଲା। କିଛି ରିପୋର୍ଟରେ କୁହାଯାଇଥିଲା ଯେ ପାକିସ୍ତାନର ନ୍ୟାସନାଲ କମାଣ୍ଡ ଅଥରିଟି ୧୦ ମେ’ରେ ବୈଠକ କରିବ। କିନ୍ତୁ ପରେ ସେମାନେ ଏହାର ଖଣ୍ଡନ କରିଥିଲେ। ପାକିସ୍ତାନର ବୈଦେଶିକ ମନ୍ତ୍ରୀ ନିଜେ ରେକର୍ଡରେ ପରମାଣୁ ବିଷୟରେ ବୈଠକ ହେବାକୁ ଅସ୍ୱୀକାର କରିଥିଲେ। ଆମର ଅବସ୍ଥାନ ସ୍ପଷ୍ଟ ଯେ ଆମେ ପରମାଣୁ ବ୍ଲାକମେଲ ଆଗରେ ମୁଣ୍ଡ ନୁଆଁଇବୁ ନାହିଁ। ଆମେ ଏହାର ନାମରେ ଆତଙ୍କବାଦର ଆଡ୍ଡା ଚଳାଇବାକୁ ଅନୁମତି ଦେବୁ ନାହିଁ। ବିଶ୍ୱର ବିଭିନ୍ନ ଦେଶ ସହ ଆଲୋଚନାରେ ମଧ୍ୟ ଆମେ ଏହା ସ୍ପଷ୍ଟ କରିଦେଇଛୁ।
