୧୮ ବର୍ଷର ବଲିଉଡ କ୍ୟାରିୟରରେ ଦୀପିକା ପାଦୁକୋନ ସଫଳତା ଏବଂ ଲୋକପ୍ରିୟତା ହାସଲ କରିଛନ୍ତି। ଆଜି ସେ ବଲିଉଡର ସବୁଠାରୁ ଧନୀ ଏବଂ ପ୍ରସିଦ୍ଧ ଅଭିନେତ୍ରୀମାନଙ୍କ ମଧ୍ୟରେ ଜଣେ। ଦୀପିକା ବଡ଼ ବଡ଼ ସୁପରଷ୍ଟାରଙ୍କ ସହିତ ପରଦା ଅଂଶୀଦାର କରି ବକ୍ସ ଅଫିସରେ ଟଙ୍କାର ବର୍ଷା କରିଛନ୍ତି। ତେବେ ଆସନ୍ତୁ ଜାଣିବା ଏହି ଅଭିନେତ୍ରୀଙ୍କର ପାଞ୍ଚଟି ସର୍ବାଧିକ ଆୟ କରିଥିବା ଚଳଚ୍ଚିତ୍ର କେଉଁଗୁଡ଼ିକ? ଏହି ପାଞ୍ଚଟି ଚଳଚ୍ଚିତ୍ର ମିଳିତ ଭାବେ ପ୍ରାୟ ୩୫୦୦ କୋଟି ଟଙ୍କାର ଆୟ କରିଛି, ଯେଉଁଥିରୁ ଚାରୋଟି ଚଳଚ୍ଚିତ୍ର ବ୍ଲକବଷ୍ଟର ହୋଇଛି।
ପଠାନ– ଦୀପିକା ପାଦୁକୋନଙ୍କର ସର୍ବାଧିକ ଆୟ କରିଥିବା ଚଳଚ୍ଚିତ୍ର ହେଉଛି ‘ପଠାନ’। ୨୦୨୩ ଆରମ୍ଭରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ର ବକ୍ସ ଅଫିସରେ ତାଣ୍ଡବ ସୃଷ୍ଟି କରିଥିଲା। ବିଶ୍ୱବ୍ୟାପୀ ବକ୍ସ ଅଫିସରେ ‘ପଠାନ’ ୧୦୫୫ କୋଟି ଟଙ୍କାର ବିପୁଳ ଆୟ କରିଥିଲା ଏବଂ ଏହା ବ୍ଲକବଷ୍ଟର ହୋଇଥିଲା।
କଲ୍କି ୨୮୯୮ ଏଡି – ଦୀପିକାଙ୍କ କ୍ୟାରିୟରର ଦ୍ୱିତୀୟ ସର୍ବାଧିକ ସଫଳ ଚଳଚ୍ଚିତ୍ର ହେଉଛି ‘କଲ୍କି ୨୮୯୮ ଏଡି’। ଏହାର ଆୟ ‘ପଠାନ’ର ନିକଟବର୍ତ୍ତୀ ଥିଲା। ୨୦୨୪ରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରରେ ତାଙ୍କ ସହିତ ପ୍ରଭାସ, ଅମିତାଭ ବଚ୍ଚନ, କମଲ ହାସନ ଭଳି ଦିଗ୍ଗଜ ଅଭିନେତାମାନେ କାର୍ଯ୍ୟ କରିଥିଲେ। ଏହି ଚଳଚ୍ଚିତ୍ରର ବିଶ୍ୱବ୍ୟାପୀ ଆୟ ୧୦୫୦ କୋଟି ଟଙ୍କା ରେକର୍ଡ କରାଯାଇଥିଲା ଏବଂ ଏହା ମଧ୍ୟ ବ୍ଲକବଷ୍ଟର ହୋଇଥିଲା।
ପଦ୍ମାବତ – ‘ପଦ୍ମାବତ’ ଦୀପିକା ପାଦୁକୋନଙ୍କ କ୍ୟାରିୟରର ଅନ୍ୟତମ ଶ୍ରେଷ୍ଠ ଚଳଚ୍ଚିତ୍ରମାନଙ୍କ ମଧ୍ୟରୁ ଗୋଟିଏ। ଏହି ବ୍ଲକବଷ୍ଟର ଚଳଚ୍ଚିତ୍ରରେ ସେ ତାଙ୍କ ସ୍ୱାମୀ ରଣବୀର ସିଂହଙ୍କ ସହିତ କାର୍ଯ୍ୟ କରିଥିଲେ। ରଣବୀର ଆଲାଉଦ୍ଦୀନ ଖିଲଜୀଙ୍କ ଚରିତ୍ରରେ ଥିବା ବେଳେ ଦୀପିକା ରାଣୀ ପଦ୍ମିନୀଙ୍କ ଚରିତ୍ରରେ ଦର୍ଶକଙ୍କ ହୃଦୟ ଜିତିବାରେ ସଫଳ ହୋଇଥିଲେ। ‘ପଦ୍ମାବତ’ ୫୮୫ କୋଟି ଟଙ୍କାର ଆୟ କରିଥିଲା।
ଚେନ୍ନାଇ ଏକ୍ସପ୍ରେସ – ‘ଚେନ୍ନାଇ ଏକ୍ସପ୍ରେସ’ ବକ୍ସ ଅଫିସରେ ୪୨୨ କୋଟି ଟଙ୍କାର ଆୟ କରିଥିଲା। ୨୦୧୩ରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରର ନିର୍ଦ୍ଦେଶନା ରୋହିତ ଶେଟ୍ଟୀ ଦେଇଥିଲେ ଏବଂ ଏଥିରେ ଦୀପିକା ଶାହରୁଖ ଖାନଙ୍କ ବିପକ୍ଷରେ ମୁଖ୍ୟ ଭୂମିକାରେ ଅଭିନୟ କରିଥିଲେ। ଏହି ଚଳଚ୍ଚିତ୍ର କେବଳ ବକ୍ସ ଅଫିସରେ ବିପୁଳ ଆୟ କରିବାରେ ସଫଳ ହୋଇନଥିଲା , ବରଂ ବ୍ଲକବଷ୍ଟର ମଧ୍ୟ ହୋଇଥିଲା।
ଫାଇଟର– ‘ଫାଇଟର’ରେ ଦୀପିକା ହ୍ରିତିକ ରୋଶନଙ୍କ ସହିତ ପରଦା ଅଂଶୀଦାର କରିଥିଲେ। ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶନାରେ ନିର୍ମିତ ଏହି ଚଳଚ୍ଚିତ୍ର ୨୦୨୪ ଜାନୁଆରୀରେ ମୁକ୍ତିଲାଭ କରିଥିଲା। ୩୫୮ କୋଟି ଟଙ୍କାର ବିଶ୍ୱବ୍ୟାପୀ ଆୟ କରି ଫାଇଟର ଦୀପିକାଙ୍କ କ୍ୟାରିୟରର ପଞ୍ଚମ ସର୍ବାଧିକ ଆୟ କରିଥିବା ଚଳଚ୍ଚିତ୍ର ହୋଇପାରିଛି।
