ବାଂଲାଦେଶରେ ଶେଖ ହସିନା ସରକାରଙ୍କ ପତନ ପରେ ସ୍ଥିତି ସାମାନ୍ୟ ହେବାର ନାଁ ନେଉନାହିଁ। ନୂଆ ଖବର ଅନୁସାରେ ବାଂଲାଦେଶର ସେନା ମୁଖ୍ୟ ତାଙ୍କ ସୈନିକମାନଙ୍କୁ ଢାକାରେ ଜମା ହେବାକୁ ଆଦେଶ ଦେଇଛନ୍ତି। ଏହି ଆଦେଶ କାହିଁକି ଦିଆଯାଇଛି, ତାହା ସ୍ପଷ୍ଟ ହୋଇନାହିଁ, କିନ୍ତୁ ଗତ କିଛି ସପ୍ତାହର ଘଟଣାକ୍ରମ ଦେଖିଲେ ଏହି ଆଦେଶ କୌଣସି ବଡ଼ ଘଟଣାର ସଙ୍କେତ ହୋଇପାରେ। ବାଂଲାଦେଶରେ ସେନା ବିଦ୍ରୋହ ଦ୍ୱାରା କାମଚଳା ସରକାରକୁ କ୍ଷମତଚ୍ୟୁତ କରିପାରେ ବୋଲି ଆଶଙ୍କା ବ୍ୟକ୍ତ କରାଯାଉଛି ।
ନର୍ଥ-ଇଷ୍ଟ ନ୍ୟୁଜର ଏକ ରିପୋର୍ଟ ଅନୁସାରେ, ବାଂଲାଦେଶ ସେନା ଶୁକ୍ରବାର ଦିନ ଅଜ୍ଞାତ ସଂଖ୍ୟାରେ ସାଞ୍ଜୁଆ ଯାନ ଏବଂ ପ୍ରତ୍ୟେକ ବ୍ରିଗେଡରୁ ୧୦୦ ଜଣ ସୈନିକଙ୍କୁ ଢାକାରେ ପହଞ୍ଚିବାକୁ ନିର୍ଦ୍ଦେଶ ଦେଇଛି। ଏହି ରିପୋର୍ଟରେ ସୂତ୍ର ଉଲ୍ଲେଖ କରି କୁହାଯାଇଛି ଯେ ସାଭାରସ୍ଥିତ ୯ମ ଡିଭିଜନର ସୈନିକମାନେ ଢାକାରେ ପହଞ୍ଚିବା ଆରମ୍ଭ କରି ଦେଇଛନ୍ତି।
ଏହି ଦୁଇ ଘଟଣା ସହ ଜଡ଼ିତ ହୋଇପାରେ ସେନାର ଫରମାନ
ନିକଟରେ ଦୁଇଟି ଘଟଣା ଘଟିଛି, ଯାହା ଯୋଗୁଁ ସମ୍ଭବତଃ ସେନା ଏହି ପଦକ୍ଷେପ ନେଇଥାଇପାରେ। କିଛି ଦିନ ପୂର୍ବରୁ ଛାତ୍ର ନେତା ତଥା ଗ୍ରାମୀଣ ଉନ୍ନୟନ ଓ ସହକାରିତା ମନ୍ତ୍ରଣାଳୟର ପରାମର୍ଶଦାତା ଆସିଫ ମହମୂଦ ଶାଜିବ ଭୁଇଁୟାଙ୍କର ଏକ ପୁରୁଣା ଭିଡିଓ ସାମ୍ନାକୁ ଆସିଥିଲା, ଯେଉଁଥିରେ ସେ ଦାବି କରୁଥିବା ନଜର ଆସିଥିଲେ ଯେ ସେନା ମୁଖ୍ୟ ଜେନେରାଲ ଓ୍ବାକର-ଉଜ୍-ଜମାନ ଅନିଚ୍ଛା ସହ ମହମ୍ମଦ ଯୁନୁସଙ୍କୁ ବାଂଲାଦେଶର ନେତୃତ୍ୱ ଦେବାକୁ ସହମତି ଦେଇଥିଲେ।
ଏହା ପୂର୍ବରୁ, ଅନ୍ୟ ଜଣେ ଛାତ୍ର ନେତା ହସନତ ଅବଦୁଲ୍ଲା ୧୧ ମାର୍ଚ୍ଚରେ ଜେନେରାଲ ଜମାନଙ୍କ ସହ ଏକ ଗୋପନୀୟ ବୈଠକ ପରେ ସେନା ବିରୋଧରେ ଆନ୍ଦୋଳନ ଆରମ୍ଭ କରିବାକୁ ସାର୍ବଜନୀନ ଭାବେ ଧମକ ଦେଇଥିଲେ। ଏହାର କାରଣ ଥିଲା ଯେ ସେନା ମୁଖ୍ୟ ଶେଖ ହସିନାଙ୍କ ଦଳ ‘ଆଓ୍ବାମୀ ଲିଗ୍’ର ବାଂଲାଦେଶ ରାଜନୀତିକୁ ପୁନର୍ବାର ଫେରିବା ଏବଂ ନିର୍ବାଚନରେ ଭାଗ ନେବା ବିଷୟରେ କହିଥିଲେ।
ସେନା ମୁଖ୍ୟ କାହିଁକି ଏହି ପଦକ୍ଷେପ ନେଲେ?
ସେନା ମୁଖ୍ୟ ଏବଂ ବର୍ତ୍ତମାନ ବାଂଲାଦେଶର କ୍ଷମତା ସମ୍ଭାଳୁଥିବା ନେତାମାନଙ୍କ ମଧ୍ୟରେ ସବୁକିଛି ଠିକ୍ ନଜର ଆସୁନାହିଁ। ଅନେକ ରିପୋର୍ଟରେ ଏହା ସାମ୍ନାକୁ ଆସିଛି ଯେ ସେନା ମୁଖ୍ୟ ଯୁନୁସ ପ୍ରଶାସନକୁ ବାଂଲାଦେଶର ସ୍ଥିତି ନିୟନ୍ତ୍ରଣ ପାଇଁ ଲଗାତାର ଚେତାବନୀ ଦେଉଛନ୍ତି। ଏପରି ସ୍ଥିତିରେ ଛାତ୍ର ନେତାମାନଙ୍କୁ ଏହି ଆଶଙ୍କା ରହିଛି ଯେ ସେନା ମୁଖ୍ୟ ପୁଣି ଥରେ ଶେଖ ହସିନାଙ୍କ ଆଓ୍ବାମୀ ଲିଗ୍ ପାଇଁ ରାସ୍ତା ତିଆରି କରୁଛନ୍ତି। ଏହି କାରଣରୁ ଯେଉଁମାନଙ୍କ ହାତରେ ବର୍ତ୍ତମାନ ବାଂଲାଦେଶର ନେତୃତ୍ୱ ରହିଛି, ସେମାନେ ସେନାର ପ୍ରତିଷ୍ଠାକୁ କ୍ଷତି ପହଞ୍ଚାଇବାକୁ ଚେଷ୍ଟା କରୁଛନ୍ତି। ଏହାକୁ ଦୃଷ୍ଟିରେ ରଖି ସେନା ମୁଖ୍ୟ ଆଗାମୀ ଦିନରେ କୌଣସି ବଡ଼ ଆନ୍ଦୋଳନର ମୁକାବିଲା କରିବା ପାଇଁ ଆଗୁଆ ପ୍ରସ୍ତୁତି ଆରମ୍ଭ କରି ଦେଇଛନ୍ତି। ଢାକାରେ ସୈନିକମାନଙ୍କୁ ଜମା କରିବାର ନିର୍ଦ୍ଦେଶକୁ ଏହି ପ୍ରସ୍ତୁତିର ଦୃଷ୍ଟିକୋଣରୁ ଦେଖାଯାଉଛି।
